Arrestohet i dyshuari për dhunimin e 15 vjeçares, kishte krijuar kontakt me viktimën përmes Snapchat

Një rast i rëndë i abuzimit seksual ndaj një të miture është rikthyer sot në vëmendje të Policisë së Kosovës, pasi është ndaluar dhe intervistuar një person i dyshuar për përfshirje në këtë ngjarje që tronditi opinionin muaj më parë.

Sinjali mëson ekskluzivisht se sot është shoqëruar në polici i dyshuari i cili dyshohet për veprën penale “Dhunim”, lidhur me një incident të ndodhur më 28 shtator 2024 në fshatin Kraisht të Lipjanit.

Sipas kallëzimit të dhënë nga viktima, një vajzë e mitur e lindur në vitin 2010, e njëjta kishte krijuar kontakt me një person përmes rrjetit social Snapchat. Po atë ditë, ata ishin takuar fizikisht në fshat, ku i dyshuari me veturë e kishte çuar të miturën në një lokacion të izoluar, ku sipas saj kishte ndodhur marrëdhënia seksuale.

Në bazë të deklarimeve të vajzës dhe veprimeve të para hetimore, ishte inicuar menjëherë rasti si “Dhunim”, nën koordinimin e Prokurorisë për të Mitur, e cila autorizoi veprimet e nevojshme për grumbullimin e provave dhe identifikimin e personit të përfshirë.

Pas hetimeve disa mujore, sot është shoqëruar dhe intervistuar në cilësinë e të dyshuarit Përparim Bllaca, në prezencën e avokatit të tij. Me vendim të prokurorisë, ndaj tij është lëshuar masa e ndalimit prej 48 orësh dhe është dërguar në qendrën e ndalimit, ndërsa ndaj tij po përgatitet kallëzimi penal për veprën e rëndë.