Niset grupi i parë i haxhilerëve nga Kosova: Më i riu është një 15-vjeçar
Grupi i parë i besimtarëve myslimanë nga Kosova është nisur sot nga Aeroporti Ndërkombëtar “Adem Jashari” drejt Mekës për të kryer obligimin e haxhit.
Sipas njoftimit të Bashkësisë Islame të Kosovës (BIK), ky grup përbëhet nga 297 persona, të cilët vijnë nga komunat e Prishtinës dhe Fushë Kosovës. Ata janë nisur në orët e hershme të mëngjesit, ndërkohë që grupet e tjera pritet të udhëtojnë në ditët në vijim.
“Haxhiu më i ri për këtë vit është një 15-vjeçar nga Prishtina, kurse më e vjetra është një 84-vjeçare poashtu nga Prishtina”, thuhet në njoftim.
“Nga Drejtoria për Haxh dhe Umre e Bashkësisë Islame të Kosovës thonë se gjithçka është duke shkuar mbarë ashtu siç është paraparë. Kryesia e Bashkësisë Islame të Kosovës njofton se këtë vit nga Kosova për ta kryer haxhin do të udhëtojnë 1576 besimtarë”, është thënë tutje në njoftimin e BIK-ut.
