Dështimi i 22-të me radhë, Kurti: Kuvendin nuk e konstituon fituesi, por të gjithë

Kryeministri i Kosovës në detyrë, Albin Kurti, pas dështimit të 22-të për konstituimin e Kuvendit të Kosovës, theksoi se Kosova vazhdon të ketë një qeveri në detyrë, duke e ripërsëritur përgjegjësinë e fituesit për formimin e qeverisë.

Ai ka thënë se Kuvendin nuk e konstituon fituesi, por të gjithë, ndërsa ka uruar për një përgjigje sa më të shpejtë nga Gjykata Kushtetuese për votimin e fshehtë

“Kosova ka qeveri në detyrë, unë jam kryeministër në detyrë. Ajo që i ndihmon Kosovës është Kuvendi i ri i Republikës. Kuvendin nuk e konstituon fituesi, por të gjithë. Si fitues të zgjedhjeve me 48 deputetë dhe me 9 deputetë të pakicave që na janë bashkuar, e kemi përgjegjësinë për ta formuar qeverinë. Pra, fituesi e ka përgjegjësinë për formimin e qeverisë”.

Ndërkaq, për ta konstituuar Kuvendin, sipas tij përgjegjësinë e kanë të gjithë deputetët dhe sipas tij, ata po bëjnë gabim që po e pamundësojnë kuorumin për votimin e fshehtë.

Për më tepër, Kryeministri në detyrë ka shmangur pyetjet lidhur me bastisjet e fundit në katër lokacione të ndryshme, të kryera në kuadër të hetimeve për dhënien me qira të fabrikës së mbetjeve shtazore.