Abdixhiku pas intervistimit të Pecit: Paratë e vjedhura nga ata që e shohin veten mbi shtet, do të kthehen cent më cent

Kryetari i LDK-së, Lumir Abdixhiku, ka reaguar pas intervistimit të ministrit në detyrë të Bujqësisë, Faton Peci, nga Prokuroria Speciale, raporton Gazeta Sinjali.

Abdixhiku ka theksuar se edhe në Kosovë, sikurse në çdo vend tjetër të Evropës, do të dalin prokurorë të rinj që do të luftojnë korrupsionin dhe do të trajtojnë çdo akt hajnie, përfshirë ato të pushtetarëve.

“Edhe në Kosovë, sikurse në secilin vend tjetër në Evropë, do të del një ditë një prokuror a dy, djem e vajza të reja e të rinj, që kanë guxim e integritet të trajtojnë secilin akt korruptiv; secilën hajni. Edhe atë të pushtetarëve. Sidomos atë të pushtetarëve,” ka deklaruar Abdixhiku.

Ai ka shtuar se në një të ardhme të tillë, kur korrupsioni do të luftohet pa frikë, do të mburremi me shtetin dhe arritjet tona, ndërsa politikanët që mbrojnë hajninë nuk do të kenë më asnjë vlerë.

Reagimi i plotë:

Edhe në Kosovë, sikurse në secilin vend tjetër në Evropë, do të del një ditë një prokuror a dy, djem e vajza të reja e të rinj, që kanë guxim e integritet të trajtojnë secilin akt korruptiv; secilën hajni.

Sidomos atë të pushtetarëve.

Atë ditë do të mburremi të gjithë – me shtetin tonë, me arritjet tona; me integritetin e njerëzve që i shërbejnë popullit të tyre pa frikë. Atë ditë, piskamat e politikanëve që mbrojnë hajninë vetëm pse hajni është i tyre – atë që u bërtet me fakte mu para syve – atë ditë, këto piskama nuk do të kenë më asnjë vlerë.

Le të shpresojmë e besojmë, se pas aq shumë vitesh pritjeje, një guxim i tillë tashmë ka lindur. Dhe me të, ka lindur dhe një epokë e re e popullit tonë. Në këtë epokë, një e vërtetë e pashmangshme do të qëndrojë gjithëherë – se paret e vjedhura nga ata që e shohin veten mbi shtet, ligj e vend, do të kthehen cent më cent. Nga të gjithë!