Tentoi të fusë kokainë në burg – arrestohet një grua

Një grua është arrestuar në flagrancë në Qendrën Korrektuese Dubravë, pasi u kap duke tentuar të fuste kokainë të fshehur në trup gjatë një vizite te një i afërm që vuan dënimin në këtë institucion, raporton Gazeta Sinjali.

Ngjarja ka ndodhur më 27 maj rreth orës 15:00, kur Ferdije Morina, 52-vjeçare, në cilësinë e vizitores, ka hyrë në sallën e takimeve dhe më pas është larguar për në tualet.

Pasi është kthyer, zyrtarët korrektues kanë ushtruar kontroll mbi të, duke zbuluar një pako të mbështjellë, të fshehur në trup, që dyshohet të jetë kokainë.

Lënda narkotike është peshuar dhe ka rezultuar 5 gram, ndërsa e dyshuara është arrestuar menjëherë dhe është dërguar në zyrat e Njësisë së DHTN-së në Pejë, ku është intervistuar në prani të avokatit të saj mbrojtës.

Burimet e Gazetës Sinjali brenda hetuesisë bëjnë me dije se rasti është iniciuar për veprën penale “Blerja, posedimi, shpërndarja dhe shitja e paautorizuar e narkotikëve, substancave psikotrope dhe analoge”, sipas nenit 267 në lidhje me nenin 275 të Kodit Penal.

Me vendim të prokurorit kujdestar, ndaj saj është caktuar masa e ndalimit prej 48 orësh, ndërsa hetimet po vazhdojnë për të zbardhur se kujt i dedikohej sasia e kokainës dhe nëse ka persona të tjerë të përfshirë në tentativën e futjes së drogës në burg.

Gazeta Sinjali raportoi edhe më 8 maj për arrestimin e gruas së njëjtë, në Istog. Ajo po kërkohej nga Policia, dhe kur u kap iu gjet edhe kokainë.