“Kam me të gjujtë prej ballkonit”, djali që humbi banesën në bixhoz kanos babain e tij

Numri i rasteve të dhunës në familje ka marrë përmasa shqetësuese në vendin tonë, pasi çdo ditë persona të ndryshëm përfundojnë në pranga si të dyshuar për dhunë ndaj familjarëve. Këto raste bëhen edhe më të rënda, kur viktima janë prindërit të cilët përjetojnë dhunë psikike e fizike nga fëmijët e tyre, raporton Gazeta Sinjali.

Një rast i tillë ka ndodhur në mbrëmjen e 27 majit në rrugën “Qamil Ilazi” në Ferizaj, ku një burrë ka kërcënuar babain e tij dhe ka dëmtuar banesën në të cilën ishte vendosur përkohësisht, raporton Gazeta Sinjali.

Burimet e Sinjalit bëjnë me dije se i dyshuari është 42-vjeçari Fidan Halili, i cili kishte humbur banesën e tij në bixhoz dhe përkohësisht po qëndronte te babai, F.H., 73-vjeçar. Por në vend që ta vlerësonte mikpritjen, ai kishte ushtruar dhunë ndaj të moshuarit dhe e kishte kërcënuar rëndë.

Në deklaratën e dhënë para hetuesve, viktima ka pohuar se djali e kishte kanosur rëndë, duke i thënë “kam me të gjujtë prej ballkonit”, ndërkohë që kishte shkaktuar dëme të konsiderueshme në orenditë e banesës.

Me të marrë vesh rastin, në vendin e ngjarjes kanë dalë njësitë reaguese të Policisë, ndërsa i dyshuari ka rezistuar arrestimit, por më pas është vënë në pranga dhe shoqëruar për në stacionin policor në Ferizaj.

Pas intervistimit, me vendim të prokurorisë, Fidan Halili është ndaluar për 48 orë dhe është dërguar në qendrën e mbajtjes në Prishtinë.

Rasti do të procedohet në procedurë të shpejtë penale për veprat “Kanosje” dhe “Dhunë në familje”.

Sinjali do të përcjellë çdo zhvillim të mëtejshëm.

Shënim: Personai i apostrofuar në këtë artikull prezumohet i pafajshëm derisa fajësia e tij të mos provohet me vendim të formës së prerë nga gjykata.