Kurti kritikon Odën Ekonomike: Koha e barrikadave ka kaluar

Në prag të hyrjes në fuqi të liberalizimit të tregut të energjisë elektrike, i paraparë për 1 qershor, disa biznese në Kosovë kanë paralajmëruar protesta duke kërcënuar me bllokim të hyrjeve kryesore të Prishtinës nga ora 10:00 deri në 12:00. Por ky paralajmërim është kundërshtuar ashpër nga kryeministri në detyrë, Albin Kurti.

Gjatë mbledhjes së Qeverisë në detyrë të enjten, Kurti tha se koha e barrikadave ka kaluar dhe nuk do të lejohet vendosja e tyre përsëri, duke u bërë thirrje bizneseve për reflektim dhe bashkëpunim.

“Nuk mund të mbrojmë 1% të bizneseve në kurriz të 99%. Koha e barrikadave ka kaluar. I kemi hequr kudo ku kanë qenë dhe nuk do të lejojmë të vendosen të reja. U bëjmë thirrje bizneseve të mendojnë në mënyrë të mençur dhe ne do t’i mbështesim”, tha ai.

Sipas Kurtit, nga dalja në treg të hapur preken rreth 1200 ndërmarrje, që përfaqësojnë vetëm 1% të totalit të ndërmarrjeve në Kosovë. Prej tyre, rreth 300 janë prodhuese dhe kanë konsum më të madh të energjisë, andaj sipas tij preken më së shumti.

“Por duhet theksuar se ky proces nuk është i befasishëm”, shtoi ai, duke kujtuar se ligji për energjinë elektrike është miratuar që më 2016, ndërsa faza e parë e liberalizimit ka nisur më 2017 dhe se faza e dytë është shtyrë disa herë përgjatë këtyre tetë viteve, për t’u dhënë kohë bizneseve të përgatiten.

Kurti përmendi se ndërmarrjet kanë përfituar nga tarifa të rregulluara dhe subvencione që arrijnë në 26 milionë euro, ndërsa shtoi se Qeveria ka ofruar ndihmë edhe gjatë pandemisë dhe krizës energjetike.

Ai theksoi se janë ofruar skema për efikasitet energjetik, për instalim të paneleve solare, si dhe subvencione për pajisje dhe makina më efiçiente, duke i konsideruar këto si masa konkrete të mbështetjes për sektorin privat.

Në adresim të drejtpërdrejtë ndaj Odës Ekonomike të Kosovës, Kurti u shpreh kritik për rolin e saj në organizimin e protestës së paralajmëruar.

“Oda Ekonomike që duhej të qëndronte pranë bizneseve për t’u përballur me realitetin e ri, sot po tenton të bllokojë rrugët magjistrale me kërkesën për shtyrje. Por ajo çka nuk po iu tregon Oda Ekonomike është se kërkesa e tyre për një vit shtyrje nuk e zgjidh problemin, por vetëm e bart koston e energjisë te fatura e secilit prej jush”, deklaroi ai.

Kurti përsëriti qëndrimin se Qeveria mbetet e përkushtuar për ta mbështetur sektorin privat, por jo duke ndikuar negativisht tek shumica e qytetarëve dhe bizneseve tjera që nuk përfshihen në këtë rregullore.