Mjekët turq me mision humanitar për operimin e 12 fëmijëve me probleme në zemër

Një ekip i specializuar i mjekëve nga Turqia ka ardhë në Kosovë me një mision humanitar nga organizata ndërkombëtare “Muntada Aid”, për trajtimin e 12 fëmijeve me probleme të lindura në zemër.

Në njoftimin e Qendrës Klinike Universitare të Kosovës thuhet se është realizuar me sukses ndërhyrja e parë e këtij lloji në Ballkanin Perëndimor, pra trajtimi kirurgjikal i një të porsalinduri me atresion të arteries pulmonare, një gjendje e rëndë kardiake që rrezikon jetën. Kjo u bë në bashkëpunim të ngushtë me Klinikën e Pediatrisë, Klinikën e Kirurgjisë së Fëmijëve, Klinikën e Anestezionit dhe Klinikën e Neonatologjisë.

“Falë përkushtimit të profesionistëve tanë dhe bashkëpunimit të frytshëm me ekipin turk, ky intervenim i ndërlikuar përfundoi me sukses dhe i dha foshnjës shansin për një jetë normale. Ky operacion është pjesë e një misioni humanitar që ka për synim ofrimin e trajtimit për 12 fëmijë me sëmundje të rënda kardiake, të cilët aktualisht po operohen në QKUK, nga kardiokirurgë dhe specialistë nga Turqia”, thuhet në njoftim.

“ShSKUK shpreh mirënjohje të thellë për kontributin e organizatës ‘Muntada Aid’, për përkushtimin dhe mbështetjen e tyre në shërbim të fëmijëve tanë, si dhe për mjekët turq që po japin ekspertizën e tyre më të mirë në këtë mision jetik”.

Ndër tjera shtohet se ekipin mjekëso nga Turqia dhe mjekët kosovarë të përfshirë në këtë sukses janë: Prof. dr. Ilker Yucel, kardiolog, Prof. dr. Halil Demir, kardiolog, Prof. dr. Oktay Korun, kirurg kardiak, Dr. Abid Karagoz, anesteziolog dhe Dr. Ramush Bejiqi dhe ekipin vendor të mjekëve dhe stafit përcjellës. Emre Ozturk, teknik i anesteziologjisë, Ercan Ersoy, perfuzionist, Husnyie Kaya, infermier i anestezisë dhe kujdesit intensiv, Musa Turgut, teknik i laboratorit të kateterizimit.