Mosmarrëveshja për muzikë përfundon me sulm fizik

Përdorimi i muzikës me zë të lartë, shpesh burim pakënaqësish në mes fqinjëve, këtë herë ka shkaktuar një përplasje serioze në fshatin Vragoli të Fushë Kosovës. Një mosmarrëveshje që nisi si debat verbal për zhurmën, ka përfunduar në përleshje fizike mes tre personave, ku për pasojë njëri prej tyre është ndaluar nga Policia.

Kjo ka ndodhur në rrugën “Behar Pllana” në fshatin Vragoli, komuna e Fushë Kosovës, më 29 maj 2025, rreth orës 15:00.

Burimet e Sinjalit bëjnë me dije se në përleshje janë përfshirë tre persona: Luan Pllana, 38 vjeçar si i dyshuar dhe Alaudin Pllana, 30 vjeçar e L.K, 30 vjeçar si viktima.

Sipas informacioneve, pas një debati verbal lidhur me muzikën e lartë, ka shpërthyer konfrontimi fizik ku edhe vetë i dyshuari ka pësuar lëndime dhe ka kërkuar ndihmë mjekësore.

Të gjithë personat e përfshirë janë shoqëruar në Stacionin Policor në Fushë Kosovë dhe janë intervistuar në prani të organeve kompetente.

Prokurorja kujdestare, ka urdhëruar që ndaj të dyshuarit të iniciohet procedurë për veprën penale “Sulm”, ndërsa i njëjti është ndaluar për 48 orë.

Shënim: Personi i apostrofuar në këtë artikull prezumohet i pafajshëm derisa fajësia e tij të mos provohet me vendim të formës së prerë nga gjykata.