Përfundimisht Lutfi Haziri s’garon në Gjilan, Kandidati i nominuar i LDK është Arbër Ismajli

Arbër Ismajli do të jetë kandidat i Lidhjes Demokratike të Kosovës (LDK), për kryetar të Gjilanit.

Vetë Ismajli e ka konfirmuar këtë përmes një postimi në Facebook, të enjten.

Tashmë është zyrtare se Lutfi Haziri nuk do të kandidojë për postin e kryetarit të komunës.

Ismajli thotë se ka marrë mbështetje nga kryetari partisë, Lumir Abdixhiku, e kryetari degës Lutfi Haziri.

“Me nderin më të madh pranoj nominimin si kandidat për kryetar të ardhshëm të Komunës së Gjilanit nga strukturat e LDK-së. Faleminderit kryetarit të LDK-së, Dr. Lumir Abdixhiku dhe kryetarit të degës në Gjilan, Lutfi Haziri për besimin dhe mbështetjen e palëkundur. Mirënjohje të veçantë për çdo nëndegë në çdo pëllëmbë të Gjilanit, aty ku zëri juaj më obligon dhe më jep përgjegjësi t’ju përfaqësoj”.

“Ky është një besim që më obligon dhe më motivon për punë e përkushtim të pakompromis. Gjilani ka nevojë për bashkim, për vizion të qartë dhe për energji të reja që sjellin ndryshim. Ftoj çdo qytetar të Komunës së Gjilanit, anë e kënd, që të bëhen pjesë e kësaj rruge të përbashkët. Bashkë do ta kthejmë Gjilanin në rrugën e zhvillimit, dinjitetit dhe përparimit. Koha e ndarjeve ka kaluar dhe tani është koha e bashkimit për qytetin tonë. Do të jem zëri dhe fuqia e secilit që beson në një të ardhme më të mirë”.

“Ky nominim është përgjegjësi e madhe dhe premtim për punë të pandalshme. Bashkë, me unitet dhe vizion të qartë, do ta kthejmë Gjilanin aty ku e meriton. Na pret një rrugë sfiduese, por me energji të reja ku me punë dhe vendosmëri do t’ia dalim bashkë. Ju bëjë thirrje të gjithë qytetarëve, të gjitha strukturave dhe gjeneratave që të bëhemi bashkë. Gjilani meriton shumë më shumë dhe ne bashkë këtë rrugëtim do ta bëjmë realitet. Fitorja është e përbashkët, për Gjilanin që e duam të gjithë.  Me përulësi, i juaji, Arbër R. Ismajli, në shërbim të qytetit dhe qytetarëve tanë”, ka thënë ai. /Gazeta Express