Ekskluzive: Dy shtetas algjerianë arratisen nga Qendra e Azilantëve në Vranidoll

Dy persona të izoluar janë arratisur të enjten pasdite nga Qendra e Mbajtjes së Azilantëve në fshatin Vranidoll të Prishtinës, duke alarmuar autoritetet e sigurisë.

Burime të Sinjalit bëjnë me dije se ngjarja ka ndodhur më 29 maj 2025, rreth orës 18:00, kur Oussama Abdelghafour, 26 vjeçar dhe Yassine Metidji, 28 vjeçar, të dy shtetas të Algjerisë, kanë ikur me vrap, duke kaluar rrethojat mbrojtëse të objektit.

Sipas burimeve të Sinjalit, momenti i arratisjes është vërejtur në kohë reale dhe menjëherë është njoftuar policia, e cila ka dalë në vendin e ngjarjes.

Të arratisurit ndodheshin në mbajtje me status azilanti dhe aktualisht nuk dihet vendndodhja e tyre. Njësitë policore kanë nisur veprimet operative për lokalizimin dhe kapjen e tyre.

Lidhur me rastin është kontaktuar Prokurori Kujdestar i Departamentit të Përgjithshëm, i cili ka inicuar rastin penal për “Arratisje të personit të privuar nga liria”.

Shënim: Personi i apostrofuar në këtë artikull prezumohet i pafajshëm derisa fajësia e tij të mos provohet me vendim të formës së prerë nga gjykata.