Gruaja denoncon burrin për dhunë psikike në Prishtinë – Ofendime nga xhelozia, aktivizohet policia

Numri i rasteve të dhunës në familje në vendin tonë ka marrë përmasa shqetësuese. Çdo ditë raportohen ngjarje të tilla ku viktima zakonisht janë gratë dhe vajzat që përjetojnë dhunë psikike e fizike kryesisht nga bashkëshortët e tyre, raporton Gazeta Sinjali.

Një rast i dhunës në familje është raportuar në Policinë e Prishtinës më 29 maj 2025, ku viktima E.B., 23 vjeçare ka denoncuar bashkëshortin e saj A.Sh., 26 vjeçar për sjellje abuzive dhe dhunë psikike që pretendohet se kanë ndodhur me datën 25 maj e jo vetëm.

Burime të Sinjalit bëjnë me dije se çifti është në marrëdhënie martesore prej rreth shtatë vitesh, ndërsa së fundmi raportet janë përshkallëzuar në ofendime dhe tension të vazhdueshëm verbal.

Pas denoncimit, hetuesit kanë ndërhyrë menjëherë dhe i dyshuari është arrestuar. Në deklaratën e dhënë para Policisë, A.Sh. ka mohuar çdo akt dhune fizike, por ka pranuar se ka ofenduar bashkëshorten nga, siç e ka përshkruar vetë, xhelozia.

E.B. ka refuzuar ndihmën mjekësore dhe është larguar me dëshirë nga banesa, duke u strehuar te familja e saj.

Pas konsultimit me Prokurorin Kujdestar, i dyshuari është liruar, ndërsa rasti është iniciuar dhe do të trajtohet në procedurë të rregullt gjyqësore.