Zbulohen tri raste të kontrabandës me dru

Policia e Kosovës ka identifikuar dhe ndaluar tre persona të dyshuar për transportim të kundërligjshëm të druve, në tri raste të ndara, të ndodhura në zonën e Keqekollës dhe Dabishecit, raporton Gazeta Sinjali.

Siç njofton Policia, më 20 maj 2025, njësitë policore kanë marrë sinjalizim për një kamion të ngarkuar me dru të dyshuara si të kontrabanduara nga Serbia, që po qarkullonte në rrugën Hajkobillë-Keqekollë.

Pas aktivizimit të një plani operativ, kamioni me targa vendore është ndaluar. Gjatë kontrollit, u konstatua se sasia e druve nuk ishte e damkosur dhe po transportohej pa fletë përcjellëse.

Në të njëjtën ditë, një tjetër rast u identifikua në fshatin Dabishec, ku pas një operacioni të ngjashëm, është ndaluar një tjetër kamion me dru të padokumentuara dhe pa shenja zyrtare, të cilin e drejtonte një person tjetër me kombësi kosovare.

Rasti i tretë ndodhi më 29 maj 2025, kur njësitë policore që ishin në pikë vëzhgimi në Hajkobillë, vërejtën një kamion të ngarkuar me dru teknik të llojit ahu.

Edhe në këtë rast, u konstatua mungesa e dokumentacionit përkatës dhe mospasja e damkosjes në drutë e ngarkuara.

Të tre kamionët bashkë me ngarkesën janë shoqëruar në Stacionin Policor në Keqekollë për procedura të mëtejme, ndërsa ndaj të dyshuarve kanë nisur hetimet për kontrabandë të druve.

Policia ka paralajmëruar se do të vazhdojë me kontrolle të rregullta në zonat kufitare dhe rrugët rurale për të parandaluar dhe ndëshkuar aktivitetet e paligjshme të kontrabandës.