Fortune: Mira Murati ndër 50 gratë më të fuqishme në botë

Mira Murati, emri i njohur shqiptar në botën e teknologjisë globale, vazhdon të forcojë pozitat si një nga figurat kyçe të Inteligjencës Artificiale. Nga një emër premtues në Silicon Valley, ajo tashmë është një forcë që po i jep formë së ardhmes së teknologjisë.

Për këtë ndikim të jashtëzakonshëm, revista prestigjioze Fortune e ka përfshirë për herë të parë në listën e 50 grave më të pushtetshme në botë, duke e renditur në vendin e 47-të. Në renditjen e kaluar ajo ishte në pozitën e 57-të, duke shënuar kështu një rritje të ndjeshme në skenën globale.

“Mira Murati, ish-drejtoreshë teknologjike e OpenAI, befasoi Silicon Valley-n kur dha dorëheqjen në shtator 2024. Ajo ishte truri pas revolucionit të ChatGPT, modelit që ndryshoi tërësisht peizazhin e Inteligjencës Artificiale. Gjashtë muaj më pas, Murati prezantoi Thinking Machines Lab, një startup inovative në fushën e IA-së që ka krijuar shumë zhurmë, megjithëse ende operon në fshehtësi”, shkruan Fortune.

Sipas revistës, pavarësisht mungesës së detajeve mbi startup-in e saj të ri, ndikimi i Muratit është i qartë dhe mbresëlënës.

“Ndërsa detajet mbi projektin mbeten të pakta, ndikimi i 36-vjeçares është i qartë: në mesin e majit ajo ishte pranë sigurimit të një investimi prej 2 miliardë dollarësh – raundi më i madh në historinë e teknologjisë – që vlerëson Thinking Machines në 10 miliardë dollarë”, thuhet më tej.