E kërcënoi kojshinë para policisë për një mur –përfundon në ndalim në Prishtinë

Përplasjet për çështje pronësore vazhdojnë të jenë burim konfliktesh të ashpra mes qytetarëve në vendin tonë. Mjafton një mur, një cep toke apo një pronë e diskutueshme që të ndezë tensione mes fqinjëve, që shpeshherë përfundojnë me kërcënime e përfshirje të Policisë, raporton Gazeta Sinjali.

Një ngjarje e tillë është regjistruar më 30 maj në lagjen “Rexhep Gjeli” në Prishtinë, ku një konflikt për një mur ndarës mes dy pronave ka eskaluar në kërcënime serioze, madje edhe në prezencën e zyrtarëve policorë.

Burimet e Gazetës Sinjali bëjnë me dije se më 30 maj 2025, rreth orës 12:00, V.A, rreth 42-vjeçar, ka njoftuar Policinë pasi ishte kanosur nga fqinji i tij, Faik Bekteshi, rreth 51-vjeçar, për shkak të një mosmarrëveshjeje lidhur me pronën.

Situata ka agravuar edhe pas ardhjes së policisë në vendngjarje, ku i dyshuari ka vijuar me fjalë kërcënuese ndaj ankuesit, duke e bërë të ndihet i rrezikuar dhe i pasigurt, siç ka deklaruar vetë Abdullahu.

Prokurori kujdestar është vënë në dijeni për rastin dhe ka urdhëruar ndalimin e Bekteshit për 48 orë, ndërsa rasti është iniciuar si “Kanosje”.

Gazeta Sinjali do të sjellë detaje të tjera në vijim për këtë përplasje pronësore që rrezikoi të përfundonte në dhunë.

Shënim: Personi i apostrofuar në këtë artikull prezumohet i pafajshëm derisa fajësia e tij të mos provohet me vendim të formës së prerë nga gjykata.