Kur shpallen fituesit e biletave për Shqipëri

Interesimi për ndeshjen ndërmjet Shqipërisë dhe Serbisë, që zhvillohet të shtunën në “Arenën Kombëtare” në Tiranë, ka qenë i jashtëzakonshëm, shkruan Gazeta Sinjali.

Federata Shqiptare e Futbollit (FSHF) ka njoftuar të dielën paradite se për këtë përballje janë bërë mbi 200 mijë aplikime për bileta. Afati për aplikim ishte deri më 30 maj në ora 20:00, ndërsa fituesit do të përzgjidhen deri të hënën, më 2 qershor.

FSHF bën të ditur se përzgjedhja do të bëhet përmes një shorti elektronik, që garanton një proces “krejtësisht rastësor”, duke dhënë të drejtën për blerje vetëm aplikuesve të përzgjedhur.

Federata ka theksuar se do të përdorë filtra sigurie dhe proces verifikimi për të eliminuar aplikimet e dyfishta dhe ato të dyshimta.

Po ashtu, janë paralajmëruar masa shtesë sigurie, për të siguruar që biletat të përfundojnë në duart e tifozëve të vërtetë dhe jo në treg të zi.