Arrestohet zyrtari policor që u përfshi në përleshje fizike

Një përplasje fizike në rrugën “Tranziti i Vjetër” në Prizren ka rezultuar me arrestimin e tre personave, përfshirë edhe një zyrtar policor, ka konfirmuar Inspektorati Policor i Kosovës.

Sipas njoftimit të IPK-së, rasti ka ndodhur pas një konfrontimi verbal që eskaloi në dhunë, me ç’rast disa persona kanë pësuar lëndime trupore.

Policia e Kosovës ka informuar IPK-në për incidentin që dyshohet të ketë përfshirë një zyrtar policor jashtë detyrës zyrtare, i cili është tashmë i suspenduar për një rast tjetër.

Të arrestuarit janë dy qytetarë dhe një zyrtar policor, të cilëve, me vendim të Prokurorit kujdestar të Prokurorisë Themelore në Prizren, u është caktuar masa e ndalimit prej 48 orësh.

Ata po hetohen si të dyshuar për veprën penale “Sulm”, sipas nenit 184 të Kodit Penal të Republikës së Kosovës.

“Inspektorati Policor i Kosovës mbetet i përkushtuar në realizimin e mandatit të vet ligjor për hetimin e rasteve ku dyshimet bien mbi zyrtarët policorë dhe siguron opinionin publik se çfarëdo përfshirje eventuale e zyrtarëve të sigurisë në vepra penale do të trajtohet me paanshmëri dhe profesionalizëm të plotë”, thuhet në njoftim./Paparaci