Gjendet 24-vjeçarja shtatzënë e raportuar si e zhdukur

Një rast shqetësues i zhdukjes së një gruaje shtatzënë në muajin e nëntë ka përfunduar me fat, pasi e njëjta është gjetur e sigurt dhe në gjendje të mirë shëndetësore, pas më shumë se një dite kërkimesh.

Burime të Sinjalit bëjnë me dije se më 31 maj 2025, rreth orës 13:30, në rrugën “Adem Voca” në Mitrovicë, Xhavit Haziri, 45-vjeçar kishte raportuar në polici zhdukjen e vajzës së tij Rabije Haziri, 25-vjeçare e cila ishte larguar nga shtëpia pas një mosmarrëveshjeje me bashkëshortin dhe nuk ishte kthyer më.

Me urdhër të Prokurorit kujdestar, rasti ishte iniciuar si “Person i zhdukur”, ndërsa Policia kishte nisur veprimet hetimore për gjetjen e saj.

Fatmirësisht, më 1 qershor 2025, rreth orës 21:50, Rabije Haziri është paraqitur vetë në Stacionin Policor në Mitrovicë Jug, ku gjatë intervistimit ka deklaruar se gjatë gjithë kësaj kohe kishte qëndruar e vetme, në rrugët e qytetit, duke mos kërkuar ndihmë nga askush.

Ajo ka konfirmuar se është në gjendje të mirë shëndetësore, ndërsa autoritetet po merren me vlerësimin e mëtejshëm të rastit.