Peci: Nisma mund të jetë pjesë e koalicionit, por ende nuk ka lëvizje konkrete

Ministri në detyrë i Bujqësisë, Faton Peci, ka deklaruar se qytetarët presin që të ofrohen zgjidhje për krizën politike, ndërsa ka theksuar se lëvizje nga ana e opozitës ende nuk ka.

Në një deklaratë për mediat para fillimit të seancës konstituive, Peci tha se për të kaluar në rendin e ditës, duke proceduar kandidatin për kryetar të Kuvendit, duhet një reflektim nga partitë politike që deri tani kanë refuzuar miratimin e komisionit.

“Çdo herë vijmë me shpresën që diçka ka lëviz nga ana e kampit opozitar, e vërteta është që qytetarët presin që ne me ofru zgjidhje, nuk është që s’kemi bërë lëvizje në këtë drejtim, do të kemi lëvizje atëherë kur të kemi reflektim prej partive politike që deri sot kanë refuzuar me aprovu komisionin përmes të cilit ne mund të hyjmë në pikën tjetër të rendit të ditës, që është procedimi i kandidatit për kryetar të Kuvendit”, tha Peci.

Ai gjithashtu foli edhe për takimet që ka pasur me Nismën, duke thënë se përkundër takimeve të zhvilluara para disa ditësh, nuk ka pasur ndonjë zhvillim të ri.

“Takime ka pasur para diku 2-3 ditësh, nuk e di në cfarë niveli është realizuar, por ka pasur vet akterë të VV’së që e kanë konfirmuar një gjë të tillë, por deri në këtë fazë nuk kam dijeni që ka lëvizur diçka,” tha ai.

Peci e përmendi Nismën si një “partner eventual” për qeverinë.