Dhunë ndaj gruas dhe fëmijës së mitur në Prishtinë – Burri kap për fyti bashkëshorten, ndalohet për 48 orë

Një rast tronditës i dhunës në familje është raportuar të enjten pasdite në lagjen “Qamil Bala” në Prishtinë, ku një grua ka deklaruar se bashkëshorti i saj e ka sulmuar fizikisht dhe psikologjikisht, përfshirë edhe djalin e tyre të mitur. Gazeta Sinjali mëson se i dyshuari është ndaluar për 48 orë, ndërsa rasti po trajtohet nga Prokuroria e Departamentit për Dhunë në Familje.

Sipas burimeve të Sinjalit, rreth orës 14:00, në Stacionin Policor Jugu, është raportuar rasti nga viktima G.G, 35 vjeçare, e cila ka deklaruar se rreth orës 14:00, pas një mosmarrëveshjeje të momentit, bashkëshorti i saj – G.M, 40 vjeçar – e ka kapur për fyti dhe e ka ofenduar me fjalë fyese, përpara syve të fëmijës së tyre 10-vjeçar.

Ajo ka shtuar se nuk është hera e parë që ai ushtron dhunë fizike dhe psikologjike ndaj saj dhe fëmijës, por për shkak të frikës, nuk e kishte raportuar më parë.

Të dy palët kanë marrë trajtim mjekësor dhe janë intervistuar në prezencë të autoriteteve përkatëse. I dyshuari është intervistuar në prezencë të avokatit mbrojtës, ndërsa ankuesja dhe fëmija i mitur janë intervistuar në praninë e Qendrës për Punë Sociale (QPS).

Shënim: Personi i apostrofuar në këtë artikull prezumohet i pafajshëm derisa fajësia e tij të mos provohet me vendim të formës së prerë nga gjykata.