Vetëplagoset me pushkë ajrore një person

Një incident i pazakontë ka ndodhur në fshatin Sazli të Ferizajt, ku një person është vetëplagosur me një armë ajrore, por rasti ka zbuluar edhe posedim të paligjshëm të armëve të tjera në banesën e tij.

Burimet e Sinjalit bëjnë me dije se rasti ka ndodh dje pasdite ku Arif Selmani, 43-vjeçar, është vetëplagosur aksidentalisht me një pushkë ajrore, duke e goditur veten në këmbë.

Rreth ora 20:00, Selmani është paraqitur në Emergjencën e qytetit në Ferizaj për të kërkuar ndihmë mjekësore, ndërsa pas trajtimit është shoqëruar në stacionin policor.

Pas njoftimit të njësive të reagimit dhe hetuesve, Selmani ka pranuar se në mënyrë të kundërligjshme mbante edhe një pushkë gjahu dhe municion në shtëpinë e tij.

Ai ka shprehur vullnetin për t’i dorëzuar armët, ndërkohë që policia ka dalë në vendin e ngjarjes dhe ka kryer ekzaminimin forenzik.

Gjatë kontrollit në shtëpinë e tij, janë gjetur dhe sekuestruar: Pushkë ajrore Ruger Air Scout (me të cilën është vetëplagosur), Pushkë e gjatë (e gjahut), 230 copë plumba ajror,   70 copë fishek, kalibër i panjohur, 1 copë fishek, kalibër i panjohur

Me urdhër të Prokurorit të Shtetit, ndaj të dyshuarit është iniciuar procedurë për dy vepra penale: Mbajtja në pronësi, kontroll ose posedim të paautorizuar të armëve si dhe përdorimi i armës apo mjetit të rrezikshëm.

Pas intervistimit, i dyshuari është liruar në procedurë të rregullt, ndërsa hetimet janë në vijim.

Shënim: Personi i apostrofuar në këtë artikull prezumohet i pafajshëm derisa fajësia e tij të mos provohet me vendim të formës së prerë nga gjykata.