Tjetër rast dhune – Burri rrah gruan dhe arrestohet

Një rast i rëndë dhune në familje është raportuar mëngjesin e së hënës në Obiliq, ku një grua deklaroi se është sulmuar fizikisht nga bashkëshorti i saj.

Burimet e Sinjalit bëjnë me dije se rreth orës 08:00, më 16 qershor 2025, në rrugën “Ilaz Hashani”, policia u njoftua për një incident brenda familjes. Viktima, V.H., 33 vjeçare, është intervistuar në prezencën e zyrtares së Qendrës për Punë Sociale dhe hetuesit të specializuar për dhunë në familje, ku ka deklaruar se bashkëshorti i saj, A.H., 39 vjeçar, e kishte sulmuar fizikisht.

Viktima ka marrë tretman mjekësor në QMF-Obiliq dhe më pas është strehuar tek familja e saj.

I dyshuari është shoqëruar në stacion policor dhe është intervistuar në praninë e avokatit mbrojtës.

Në koordinim me Prokurorin e Shtetit, rasti është iniciuar si “Dhuna në familje”, ndërsa A.H. është dërguar në qendrën e ndalimit me masën e 48 orëve ndalim.

Hetimet po vazhdojnë.