Sulmohet brutalisht një anëtar i komunitetit rom, dy persona ia kanë thyer nofullën

Një anëtar i komunitetit rom në Prizren është sulmuar brutalisht nga dy persona të paidentifikuar, në orët e para të mëngjesit, afër Universitetit “Ukshin Hoti”, shkruan Mitropol.

Viktima, i cili po priste autobusin për të shkuar në punë, ka pësuar lëndime të rënda në fytyrë pasi u godit me shqelm, duke i shkaktuar thyerje të nofullës.

Siç u raportua dy persona me motoçikleta i janë afruar viktimës, duke i kërkuar para. Pasi ai u shpreh se nuk kishte, njëri prej sulmuesve e goditi me shqelm në fytyrë, duke i thyer nofullën në mënyrë të tmerrshme.

Viktima, i njohur si M.M., është një djalë i ndershëm, që jeton në kushte të rënda ekonomike, pa nënë dhe me një baba me aftësi të kufizuara. Ai është dërguar menjëherë në Spitalin e Prizrenit dhe pritet t’i nënshtrohet një operacioni për riparimin e nofullës.

Policia ka nisur hetimet dhe ka identifikuar autorët përmes kamerave të sigurisë. Të dy personat janë kapur dhe do të përballen me drejtësinë.