32-vjeçari goditet qëllimisht me veturë në Prishtinë

Një rast që fillimisht u raportua si aksident trafiku, ka marrë tjetër drejtim hetimor dhe është rikualifikuar si tentim vrasje, pasi hetimet dhe pamjet e kamerave të sigurisë kanë zbuluar se viktima është goditur me qëllim.

Ngjarja ndodhi më 15 qershor 2025, rreth orës 19:30, në rrugën “Llapi” të Prishtinës, ku Egzon Isufi, 32-vjeçar, që po lëvizte në këmbë, u godit nga një veturë Audi ngjyrë hiri. Fillimisht ai u trajtua si viktimë e një aksidenti dhe u dërgua në QKUK për trajtim mjekësor.

Mirëpo, më 16 qershor, pas sigurimit të video-incizimeve të momentit të ngjarjes, është vërejtur se shoferi i veturës e kishte goditur qëllimisht këmbësorin, e më pas ishte larguar nga vendi i ngjarjes.

Pas këtyre zhvillimeve, Prokurori i Shtetit ka urdhëruar që rasti të cilësohet si “Tentim vrasje” dhe janë intensifikuar hetimet për identifikimin dhe kapjen e personit të dyshuar.

Hetimet janë në vijim dhe autoritetet nuk përjashtojnë mundësinë që motivet të lidhen me një konflikt të mëhershëm.