34 përpjekje dhe asnjë rezultat

As për të 34-tën herë nuk pati ndonjë lëvizje pozitive për konstituimin e Kuvendit të Kosovës.

Deputetët e Kuvendit të Kosovës u mblodhën sot në vazhdimin e radhës të seancës konstituive të Legjislaturës së Nëntë, raporton Paparaci.

Komisioni për zgjedhjen e kryetarit të Kuvendit me votim të fshehtë serish nuk mori votat e mjaftueshme për të filluar me procedurën e votimit për të parin e Kuvendit.

Kështu, për komisionin votuan 51 deputetë, një ishte kundër, ndërsa abstenime nuk pati.

Kryesuesi Dehari njoftoi se në mungesë të kuorumit për vendimmarrje Kuvendi ndërpret punimet për sot, për të vijuar të shtunën më 21 qershor, në orën 10:30.

Lëvizja Vetëvendosje vazhdon të mos heq dorë nga kandidatura e Albulena Haxhiut për kryetare të Kuvendit, ndërkaq partitë tjera, PDK, LDK dhe AAK kanë deklaruar se nuk do ta votojnë Haxhiun për kryeparlamentare.

Në këtë kontekst, deputetët e Aleancës për Ardhmërinë e Kosovës, të udhëhequr nga Time Kadrijaj dhe të përkrahur nga 10 deputetë të tjerë, kanë dorëzuar që më shumë se një muaj më parë një kërkesë në Gjykatën Kushtetuese.

Ata kërkojnë shqyrtimin e kushtetutshmërisë së mënyrës së formimit të këtij komisioni gjatë seancës konstituive të Kuvendit, që u mbajt më 5 maj 2025.

AAK ka shprehur shqetësime lidhur me procedurat e ndjekura, duke vënë në dyshim përputhshmërinë e tyre me Kushtetutën dhe Rregulloren e Kuvendit të Kosovës.