Murati kritikon Abdixhikun për deklaratën mbi votimin e fshehtë

Ministri në detyrë i Financave, Hekuran Murati, ka kritikuar ashpër kryetarin e LDK-së, Lumir Abdixhikun, pas deklaratave të këtij të fundit për mënyrën se si deputetët e LDK-së do të veprojnë në rast se Gjykata Kushtetuese lejon votimin e fshehtë për kryetarin e Kuvendit.

Abdixhiku të enjten kishte deklaruar se, nëse lejohet votimi i fshehtë, deputetët e partisë së tij do të marrin pjesë në seancë vetëm për ta shprehur kundërshtimin në mënyrë të hapur:

“Deputetët do të dalin, do të marrin letrën aty te tavolinat ku bëhet ai komisioni, do ta plotësojnë kundër, do ta tregojnë te kamera lartë dhe do ta vendosin në kuti të votimit – 20 vota kundër. S’ndryshon asgjë…”

Kjo deklaratë ka nxitur reagimin e Muratit, i cili përmes një postimi në rrjetet sociale ka shkruar: “Çfarë katandisje e partisë që dikur udhëhiqej nga Ibrahim Rugova! Nga parti shtet-formuese në parti votë-fotografuese.”

Ndërkohë, që nga zgjedhjet e 9 shkurtit, Kuvendi i Kosovës vazhdon të jetë i pakonstituuar, për shkak të mungesës së një marrëveshjeje për votimin e kryetares së propozuar nga LVV, Albulena Haxhiu, të cilën subjektet tjera politike kanë refuzuar ta përkrahin për postin e kryeparlamentares.