E dhimbshme: Sot i jepet lamtumira e fundit 34-vjeçarit që humbi jetën disa ditë pas aksidentit

Një aksident i rëndë trafiku që ndodhi më 6 qershor në fshatin Lushtë të Mitrovicës ka përfunduar me pasoja fatale për Lavdim Hotin, 34-vjeçar, i cili ndërroi jetë pas 14 ditësh luftë për jetën në Qendrën Klinike Universitare të Kosovës.

Siç raportoi më herët Gazeta Sinjali, aksidenti ndodhi përgjatë rrugës rajonale Pejë–Mitrovicë, kur Hoti, duke drejtuar veturën e tij të tipit “Volkswagen 1K”, humbi kontrollin në një kthesë të thellë dhe përfundoi jashtë rrugës, në një humnerë të thellë.

Ndërkohë, varrimi i të ndjerit bëhet sot, më 21 qershor 2025, në orën 17:00, në varrezat e fshatit Resnik.

Në veturë ndodheshin edhe dy pasagjere: L.N., 29-vjeçare dhe D.H., 18-vjeçare, të cilat pësuan lëndime trupore, por fatmirësisht janë jashtë rrezikut për jetë.

Siç mësoi SInjali, aksidenti dyshohet të ketë ndodhur për shkak të mosadaptimit të shpejtësisë me kushtet e rrugës, çka çoi në humbjen e kontrollit mbi automjetin dhe pasojë të rënda për të gjithë personat në veturë.