Trump thotë se ShBA-ja ka përfunduar sulmet ajrore ndaj Iranit
Presidenti Trump tha të shtunën se SHBA-ja kishte përfunduar sulmet ndaj tre objekteve bërthamore në Iran.
“Kemi përfunduar me sukses të madh sulmin tonë ndaj tre objekteve bërthamore në Iran, përfshirë Fordow, Natanz dhe Esfahan,” tha ai në një postim në rrjetet sociale.
Sulmi erdhi pasi Pentagoni zhvendosi bombarduesit e fshehtë B-2 mbi Paqësor nga baza ajrore në Missouri. B-2-at mund të mbajnë bombën GBU-57, një armë konvencionale prej 13,600 kilogramësh që, sipas analistëve të mbrojtjes, ka mundësinë më të madhe për të dëmtuar objektin e pasurimit të uraniumit në Fordow.
Trump më herët u kishte thënë ndihmësve të lartë se kishte miratuar planet për sulm ndaj Iranit, por po priste të shihte nëse Teherani do të hiqte dorë nga programi i tij bërthamor, thanë persona të njohur me diskutimet.
Ushtria izraelite vazhdoi të shtunën sulmet ndaj udhëheqjes ushtarake të Iranit dhe infrastrukturës së tij bërthamore. Ushtria njoftoi se kishte vrarë tre udhëheqës ushtarakë të tjerë iranianë dhe kishte goditur objektin bërthamor në Isfahan. Gjenerali më i lartë i Izraelit ka paralajmëruar se lufta mund të zgjasë, duke e quajtur fushatën ushtarake më të ndërlikuar në historinë e vendit.
