Grabitje në barnatore – Dy persona marrin me dhunë 300 euro dhe arratisen

Një rast grabitjeje është regjistruar pasditen e së shtunës në qytetin e Pejës, ku një barnatore është grabitur nga dy persona ende të paidentifikuar.

Burime të Gazetës Sinjali bëjnë me dije se rasti ka ndodhur më 21 qershor 2025, rreth orës 17:30, në barnatoren “Kushtrimi”, që ndodhet në rrugën “Konferenca e Bujanit”.

Sipas deklaratës së viktimës, A.H. punëtore në barnatore – dy persona kanë hyrë në barnatore, ku njëri ka qëndruar te dera ndërsa tjetri ka hyrë brenda, ka hapur arkën dhe ka grabitur 300 euro para të gatshme.

Pas grabitjes, të dy janë larguar me vrap në drejtim të panjohur.

Në vendin e ngjarjes kanë dalë njësitë patrulluese dhe hetuesit e stacionit policor, ndërsa është njoftuar prokurori i shtetit, i cili ka autorizuar nisjen e procedurës hetimore për veprën penale “Grabitja”.

Aktualisht, policia është në përpjekje për identifikimin dhe lokalizimin e të dyshuarve, ndërsa hetimet janë në zhvillim.