Burri sulmon fizikisht gruan

Një tjetër rast dhune në familje është regjistruar mbrëmjen e së hënës në qytetin e Gjilanit, ku një grua ka raportuar se është sulmuar nga bashkëshorti i saj pas një mosmarrëveshjeje brenda banesës së tyre në rrugën “Xhemejl Ymeri”.

Burime të Gazetës Sinjali bëjnë me dije se viktima S. R. ka raportuar në Polici se bashkëshorti i saj, S. Z., ka ushtruar dhunë psikike dhe fizike ndaj saj pas një debati verbal që ka eskaluar në konflikt.

Me të marrë informacionin, Policia ka ndërhyrë menjëherë, duke intervistuar të dy palët e përfshira. Pas vlerësimit të rrethanave dhe me urdhër të Prokurorit të Shtetit, i dyshuari është ndaluar për 48 orë.

Ndaj tij është iniciuar procedurë penale për veprën “Dhunë në familje” dhe “Sulm”, ndërsa rasti është në hetim nga autoritetet kompetente.