Lekaj: Kurti e ka marrë me shaka krijimin e institucioneve

Ish deputeti i AAK-së, Pal Lekaj, në një prononcim për Gazeta Blic, ka folur për deklaratat e Kurit dhe mos krijimin e institucioneve.

Ai tha se Kurti e ka marrë me shaka krijimin e institucioneve dhe edhe pse e ka shumicën, nuk e ka shumicën që ta krijojë Kuvendin e Qeverinë.

“Ajo që kam parë në deklarata të pakta që po iu drejtohet mediave kryeministri në detyrë apo më mirë të themi deputeti Kurti e ka marrë me shaka edhe krijimin e institucioneve. Është e vërtetë që VV e ka shumicën prej 42 për qind apo 48 deputetë por nuk e ka shumicën e gjithmbarshme të Kuvendit për të krijuar institucione. Prandaj duhet marrëveshje paraprake politike dhe nuk mund t’i detyrosh ish opozitarët që ta votojnë një njeri që e kanë kundërshtuar, në këtë rast Albulena Haxhiun”, u shpreh ai.

Lekaj theksoi se AAK ka dhënë emra që mund t’i votojë, teksa shtoi se një politikan i mençur do të ulej të diskutonte me partitë për marrëveshje politike dhe t’i krijonte institucionet.

“Ne si AAK kemi dhënë zgjidhje, i kemi dhënë 2-3 emra, mund të futen edhe emra të tjerë që të dalim nga kjo krizë. Të fajësosh deputetët e ish opozitës është qesharake dhe nuk duhet ky njeri të merret seriozisht sepse po bën shaka me qytetarët dhe institucionet. Nuk e di se si mendon që pa marrëveshje politike t’i zgjidhë këto probleme. Nuk e ki shumicën, i ke 48 deputetë por nuk e ke shumicën për t’i krijuar institucionet, atëherë çdo politikan i mençur do të ulej në tavolinë dhe do të bisedonte me partitë tjera që të krijohen institucionet sa më shpejt”, potencoi ish deputeti.

Sa i përket deklaratës se ish opozita po ia vazhdon mandatin, Lekaj tha se ajo nuk qëndron pasi partitë ish opozitare janë deklaruar se janë kundër dhe se nuk kanë votë për Albulena Haxhiun si kryetare të Kuvendit.

“Dhe ajo që e ka thënë që opozita po më jep jetë në qeverisje mendoj që nuk e ka me vend sepse opozita është deklaruar që nuk e voton dhe në këtë drejtim e ka bërë të qartë se me qeverinë Kurti ne nuk do të vazhdojmë. Jemi kundër, do të mbesim kundër dhe nuk do ta votojmë kandidaten që e ka propozuar Lëvizja Vetëvendosje, Albulena Haxhiun”, ka deklaruar Pal Lekaj./GazetaBlic/