Dy shkolla e vazhdojnë grevën (VIDEO)

Mësimdhënësit e gjimnazit “Sami Frashëri” dhe “Ahmet Gashi” në Prishtinë pas mbledhjes së mbajtur kanë marrë vendim që të vazhdojnë grevën. Pasi shumica prej tyre janë shprehur se kundërshtojnë ndaljen e grevës pa u plotësuar qeveria kërkesat.  Ndërkaq, nga SBASHK-u kanë thënë se shumë shpejt do të njoftojnë për pezullim apo jo të grevës tash e një muaj në arsim, shkruan Kanal10.

Propozimit të SBASHK-u për pezullim të grevës, i janë përgjigjur negativisht një pjesë e shkollave në kryeqytet. Mësimdhënësit e gjimnazit ”Sami Frashëri”në Prishtinë me 70 për qind të votave kanë vendosur që të vazhdohet me grevë deri në realizimin e kërkesave të tyre.

Kundër pezullimit të grevës janë shprehur edhe nga gjimnazi tjetër “Ahmet Gashi” në kryeqytet. Xhelal Hajrullahu, kryetar i Sindikatës ka thënë së në këtë shkollë gatishmëri për ta mbajtur mësimin ka pasur vetëm një mësimdhënës, por nxënësit nuk janë përgjigjur.

Ndërkaq, nga SBASHK-u kanë thënë se ende nuk kanë të dhëna se sa prej shkollave në vend kanë votuar pro dhe kundër pezullimit të grevës, derisa kjo sipas Reshit Kushaj do të kuptohet në fundjavë. Sindikata e Bashkuar e Arsimit, Shkencës dhe Teknologjisë gjatë të mërkurës ka bërë të ditur se po kërkon mendimin e anëtarësisë për pezullimin e grevës në arsim deri në janar dhe mësimi të fillojë më 3 tetor.