Asambleisti Xhevdet Maloku ndan lajmin historik – Lluzhani do të bëhet me shkollë të re

Lluzhani do të bëhet me shkollë të re, kështu ka njoftuar asambleisti i Vetëvendosjes, Xhevdet Maloku.

Më poshtë postimi:

Lajm i Madh për Lluzhanin me rrethinë!

Sot dua të ndaj me ju një lajm që na mbush me gëzim e shpresë për të ardhmen: Korniza Afatmesme Buxhetore 2026–2028 është votuar dhe miratuar!

Edhe më i rëndësishëm është fakti që në këtë dokument strategjik është përfshirë ndërtimi i shkollës së re të fshatit Lluzhan – një kërkesë e kahershme e jona, një nevojë reale për nxënësit, prindërit dhe mësimdhënësit tanë.

Në vitin 2027 janë paraparë 300,000 euro për fillimin e punimeve, ndërsa në vitin 2028 do të ndahen edhe 500,000 euro të tjera për ta përmbyllur këtë projekt jetik.

Ky nuk është vetëm një investim në një objekt, por një angazhim konkret për të ardhmen e fëmijëve tanë dhe për zhvillimin e zonave rurale si Lluzhani.

I jam mirënjohës të gjithë atyre që kanë kontribuar për ta përfshirë këtë projekt në KAB – përkushtimi, bashkëpunimi dhe zëri i ngritur në vendin dhe momentin e duhur e bënë këtë të mundur. Me zemër falënderoj Kryetarin e Komunës dhe Drejtorin e Arsimit për vullnetin e treguar.

➡️ Si përfaqësues në Kuvendin Komunal, më ka takuar shpesh të ngre zërin aty ku duhej që edhe Lluzhani të mos mbetet pas. Sot, më shumë se kurrë, besoj që angazhimi ka kuptim.

Faleminderit për besimin – bashkë do të vazhdojmë të punojmë për më mirë!

(FOTO është ilustrative)

Me respekt,
Xhevdet Maloku
Asambleist në Kuvendin Komunal – Podujevë