31 vjeçari kërkon para nga nëna dhe e rrah

Një rast tronditës i dhunës në familje është raportuar në rrugën “Din Mehmeti” në Prishtinë, ku një grua ka denoncuar të birin për ushtrim dhune dhe presion të vazhdueshëm.

Burimet e Sinjalit bëjnë me dije se më 22 qershor 2025, F. R, 68 vjeçare është paraqitur në Stacionin Policor për të raportuar se djali i saj, B. R, 31 vjeçar, kishte kërkuar para nga ajo, dhe pasi nuk ia kishte dhënë, kishte filluar ta dhunonte fizikisht.

Viktima, nën presion të vazhdueshëm, ishte detyruar të kërkonte para te një fqinjë për t’ia dhënë të birit.

Rasti është proceduar si “Dhuna në familje”, me vendim të prokurores kujdestare. Ndërkohë, më 26 qershor, B.R është shoqëruar në stacionin policor, ku ka mohuar akuzat, duke deklaruar se vetëm i kishte kërkuar para nënës së tij, por nuk e kishte sulmuar.

Pas intervistimit, prokurorja ka lëshuar urdhër për ndalimin e të dyshuarit për 48 orë, ndërsa hetimet janë në vijim për zbardhjen e plotë të rastit.