E humbur prej ditësh, gjendet i copëtuar trupi i yllit 19-vjeçar të TikTok-ut

Një ngjarje makabre ka tronditur opinionin publik në Peru, ku autoritetet zbuluan trupin e pajetë të një vajze 19-vjeçare, TikTok-eres Fabiola Alejandra Caicedo Piña, e cila rezultonte e zhdukur prej fillimit të qershorit.

Më 9 qershor, punonjës të impiantit të trajtimit të ujit “La Atarjea” në Lima zbuluan pjesë të trupit të Caicedos, të futura në çanta plastike dhe të hedhura jashtë objektit gjatë një inspektimi rutinë.

Autoritetet arritën ta identifikonin trupin përmes tatuazheve të saj të dallueshme, përfshirë një në krah me frazën “Love me for who I am” dhe një tjetër në trup me emrin “Paula Sophia”.

Pjesë të tjera të trupit u zbuluan më 15 qershor, por deri më 19 qershor, disa pjesë ende mungonin. Policia dyshon se viktima është mbytur përpara se të copëtohej dhe ka shenja të mundshme torture, përfshirë djegie nga cigaret në këmbë dhe në kërcinjtë e këmbëve.

Hetuesit po shqyrtojnë dy pista kryesore lidhur me motivin e krimit. Njëra është përfshirja e mundshme e Caicedos në rrjetin e trafikimit të qenieve njerëzore, një problem në rritje në Lima, ku javët e fundit janë gjetur disa trupa vajzash të reja, disa të futura në valixhe pranë lumit Rímac.

Pista tjetër lidhet me hakmarrjen: Caicedo u zhvendos në Peru nga Venezuela në vitin 2022, kur ishte vetëm 16 vjeç, së bashku me të dashurin e saj, Mayner Yoffrey Giménez Castrillo, 21 vjet më i madh.

Ai vdiq disa muaj pas mbërritjes së tyre në Lima, nën rrethana misterioze. Familja e tij ka akuzuar publikisht Caicedon se ishte përfshirë në vdekjen e tij, duke e dyshuar për bashkëpunim me një partner të ri.