Ky është vendimi i Gjykatës për Valon Sylën
Gjykata Themelore në Prishtinë ka aprovuar kërkesën e Prokurorisë Themelore në Prishtinë, lidhur me rastin e gazetarit Valon Syla.
Gjykata ka aprovuar kërkesën e Prokurorisë e cila i ka vendosur gazetarit Syla masën e ndalimit të afrimit vendit apo personit të caktuar.
Kështu është bërë e ditur në njoftimin e Gjykatës Themelore në Prishtinë.
“Divizioni për Çështje Penale ka vendosur lidhur me kërkesën e Prokurorisë Themelore në Prishtinë për caktimin e masës Ndalimi për tu ofruar vendit apo personit të caktuar, në çështjen penale ndaj të pandehurit V.S për veprën penale Lëndim i lehtë trupor”, thuhet në njoftim.
Gjyqtari i procedurës paraprake pas mbajtjes së seancës dëgjimore ka marr Aktvendim dhe ka aprovuar kërkesën e Prokurorisë Themelore në Prishtinë, ashtu që të pandehurit V.S i ndalohet ti afrohet në afërsi më të vogël se sa 5 (pesë) metra të dëmtuarës E.N.
“Kjo masë e ndalimit, sipas këtij aktvendimi do të zgjasë 1 (një) muaj duke filluar nga data 28.06.2025 deri me datë 28.07.2025, ndërsa në rast të mos respektimit të kësaj mase, ndaj të pandehurit V.S. do të zëvendësohet kjo masë me masën e paraburgimit sipas nenit 175 paragrafi 5 të KPPRK-së. Gjyqtari i procedurës paraprake vlerësoj se janë përmbushur kushtet ligjore për caktimin e masës ndalimi për tu ofruar vendit apo personit të caktuar, ngase ekziston rreziku se i njëjti mund të përsëris veprën penale të njëjtë apo mund të kryej vepër penale edhe më të rëndë”, thuhet në njoftim.
Kundër këtij aktvendimi, palët e pakënaqura kanë të drejtë ankese në Gjykatën e Apelit, përmes Gjykatës Themelore në Prishtinë./Telegrafi/
