Raportohet i zhdukur nga familja – gjendet duke vuajtur dënimin në burg
Një ngjarje e pazakontë është shënuar në Fushë Kosovë, ku një qytetare nga Franca kishte raportuar si të zhdukur babain e saj, i cili rezultoi se ndodhej në vuajtje të dënimit.
Burime të Sinjalit bëjnë të ditur se bëhet fjalë për Bekim Catot, i cili ishte shpallur person i zhdukur me datën 28 qershor nga vajza e tij, L. C., pasi nuk kishte asnjë kontakt me të që nga data 26 maj 2025.
Sipas deklaratës së saj, ajo kishte ardhur në Kosovë për ta kërkuar babain, kishte hyrë në banesën e tij në rrugën “Nëna Terezë” në Fushë Kosovë, por ai nuk ndodhej aty. Edhe përpjekjet për ta kontaktuar në telefon kishin rezultuar të pasuksesshme.
Me udhëzim të Prokurorit të Shtetit, ishte iniciuar rasti “Person i zhdukur”, mirëpo pas hetimeve të Policisë është konfirmuar se i njëjti ndodhej në burgun e Hajvalisë duke vuajtur një dënim penal.
Rasti është mbyllur si i zgjidhur, ndërsa autoritetet kanë njoftuar palët për gjetjen e tij.
