Shfrytëzoi momentin dhe vodhi tre telefona në oborrin e shkollës – arrestohet një grua

Një rast i pazakontë është raportuar mbrëmjen e së hënës në rrugën “Çika Jovina” në Mitrovicën e Veriut, ku tre vajzave u janë vjedhur telefonat ndërsa ishin duke luajtur në oborrin e shkollës fillore “Sveti Sava”.

Burimet e Gazetës Sinjali bëjnë me dije se pas raportimit të rastit dhe shikimit të kamerave të sigurisë, Policia ka identifikuar të dyshuarën si L.B., 35-vjeçare – e cila dyshohet se ka përfituar nga momenti i pakujdesisë për t’i marrë telefonat.

Pas një reagimi të shpejtë, njësitë policore kanë arritur ta lokalizojnë dhe shoqërojnë të dyshuarën brenda 15 minutave, bashkë me telefonat e vjedhur që i kishte me vete.

Prokurori kujdestar, pas shqyrtimit të rrethanave, ka urdhëruar që rasti të trajtohet si “Shpërdorim i pasurisë së huaj”, dhe është iniciuar procedura penale ndaj saj.