Krasniqi: Takimet e tjera që i ka planifikuar presidentja na qartësojnë se “a ka lëvizur VV-ja nga kryeneçësia”

Kryetari i Partisë Demokratike të Kosovës (PDK), Memli Krasniqi, ka theksuar se do të dihet nëse Lëvizja Vetëvendosje ka bërë ndonjë lëvizje nga pozita e saj aktuale pas përfundimit të takimeve të planifikuara nga presidentja Vjosa Osmani.

Në një prononcim për media pas takimit me presidenten, Krasniqi ka shprehur gatishmërinë e PDK-së për të luajtur rolin e saj në zgjidhjen e krizës politike, duke shtuar se tashmë ka qartësi nga aktgjykimi i Gjykatës Kushtetuese, i cili ka bërë të qartë rolet dhe përgjegjësitë e secilit aktor politik.

“Rikonfirmova qëndrimin dhe gatishmërinë e PDK-së për të luajtur rolin tonë në gjetjen e një zgjidhje të krizës politike, sidomos që tashmë kemi qartësi nga aktgjykimi i Kushtetueses. Aktgjykimi i ka bërë të qartë rolet e secilit. Në radhë të parë, koalicionin e parë e ka detyruar për gjetjen e kompromisit apo konsensusit. Shpresoj që këto konsulta të jenë në funksion të gjetjes së rrugëdaljes. Por mbetet që takimet e tjera që i ka planifikuar presidentja të na qartësojnë a ka apo s’ka ndryshim të kryeneçësisë politike të VV-së dhe Albin Kurtit që po e mbajnë të bllokuar Kuvendin,” ka thënë ai.