Një rast i rëndë social është shënuar sot në Han të Elezit, ku një qytetar është detyruar të përfundojë pas grilave vetëm pse nuk kishte mundësi të paguante një gjobë prej 300 eurosh.

Gazeta Sinjali mëson se bëhet fjalë për Sefedin Reqin, 28-vjeçar nga lagjja Kashan, i cili sot rreth orës 12:00 është ndaluar nga patrulla policore gjatë një pike kontrolli. Gjatë verifikimit, ai ka rezultuar me një urdhëresë aktive të lëshuar nga Gjykata, për të cilën ishte i obliguar të paguante shumën prej 300 euro.

Pasi është shoqëruar në gjykatë dhe ka bërë të ditur se nuk ka  mundësi financiare për ta paguar shumën e kërkuar, ndaj tij është ekzekutuar masa alternative, vuajtja e dënimit prej 15 ditësh burgim.

I njëjti është dërguar në burgun e caktuar nga SHKK, ndërsa për këtë veprim është njoftuar edhe familja e tij.

Ky rast rikthen në vëmendje nevojën për trajtim më human dhe social të rasteve të tilla, ku qytetarët me kushte të rënda ekonomike përfundojnë në burg për gjoba minimale, ndërsa mijëra euro të shpenzuara e të zhdukura nëpër afera mbeten të pandëshkuara.