Ish-zëvendëspresidenti turk: Mbështetesim Kosovën në rrugën drejt integrimit evropian

Kosova vazhdon të përfitojë mbështetje të fuqishme nga Turqia në fusha kyçe si siguria, ekonomia dhe integrimi evropian. Fuat Oktay, ish-zëvendëspresident turk dhe tani kryetari i Komisionit për Politikën e Jashtme të Asamblesë së Madhe Kombëtare të Turqisë, gjatë një interviste të fundit, theksoi rëndësinë e bashkëpunimit të ngushtë mes dy vendeve dhe angazhimin për të avancuar marrëdhëniet në të gjitha nivelet, shkruan Gazeta Sinjali.

Ai theksoi rolin e rëndësishëm të Kosovës në stabilitetin rajonal dhe bashkëpunimin në kuadër të NATO-s, duke nënvizuar se Turqia mbështet plotësisht integrimin e Kosovës në Bashkimin Evropian dhe zhvillimin e institucioneve të saj.

“Gjatë vizitës në Kosovë pashë një bashkëpunim dhe besim shumë të fortë si në komunitet, ashtu edhe në hierarkinë e komandës. Njerëzit ndihen më të sigurt,” tha Oktay.

Për më tepër, ai informoi se Komanda e KFOR-it, që Turqia e mori në dorëzim më parë, do të rikthehet përsëri në vjeshtë, duke treguar angazhimin e vazhdueshëm të Turqisë në sigurimin e paqes në Kosovë.

Oktay gjithashtu u shpreh se bashkëpunimi ekonomik po forcohet, me mbi 800 kompani turke aktive dhe investime që kalojnë 3.5 miliardë dollarë në Kosovë dhe Shqipëri. Ai nënvizoi rëndësinë e thellimit të partneritetit dhe zgjerimit të tregtisë dhe investimeve ndërmjet vendeve.

Në fund, u bë e ditur se në ditët në vijim pritet vizita e ministrit turk të Drejtësisë në Kosovë, si pjesë e forcimit të bashkëpunimit parlamentar dhe institucional mes dy vendeve.