Ekrem Hyseni zyrtarisht kandidat për kryetar të Podujevës
Lidhja Demokratike e Kosovës ka zyrtarizuar kandidatin për kryetar të Podujevës.
Kandidat për kryetar të Podujevës do të jetë Ekrem Hyseni.
Më poshtë postimi i Hysenit:
Të dashur qytetarë,
Veprimtarë e anëtarë të LDK-së,
Duke respektuar vullnetin e qytetarëve të Podujevës, veprimtarëve e anëtarëve të Lidhjes Demokratike të Kosovës, sot kam zyrtarizuar kandidaturën time për kryetar të Podujevës.
Derisa kërkoj besimin tuaj, e jap betimin tim se: do t’ju shërbej me nder, përgjegjësi e profesionalizëm.
Jam shumë i vetëdijshëm se Lidhja Demokratike e Kosovës, bashkërisht me besimin e secilit qytetar, jemi adresa e shpresa e vetme për ta ndalur keqqeverisjen, nepotizmin, keqpërdorimin, e për t’ua kthyer shpresën të gjithë qytetarëve llapjan.
Jo vetëm se dera ime do jetë e hapur kurdo për secilin qytetar, por çdo ditë, në çdo kohë do të jem me ju e tek ju: tek mësuesi, tek polici, tek ushtari, tek zjarrëfiksi, tek bujku e tek çdonjëri.
Ky është zotim i imi para jush sot këtu!
Duhet të jemi bashkë, të jemi një: në mënyrë që t’i ndalim ata që ia ndalën projektet Podujevës!
Fitorja e LDK-së në Llap nuk është vetëm synim, por është mision.
E këtë mision, vetëm ju të dashur qytetarë, anëtarë e veprimtarë mund ta bëni realitet.
Prandaj, sot e çdo ditë ju ftoj të flisni me familjarët tuaj, me të afërmit tuaj, me shoqërinë tuaj, të na bashkoheni sa më shumë në këtë mision, e të mobilizohemi secili.
Pres mbështetjen e çdonjërit, pres të na bashkoheni sa më shumë, pres që fitorja të jetë aq e fuqishme që t’ua prishë çdo matematikë e çdo kalkulim të tyre!
Jam me Ju, jam për Ju!
Kështu e këtu do jem përherë!
I Juaji, Doku!
