PDK: Ftesa për seancë në orën 20:00 është e çuditshme

Sekretari i Kuvendit, Arben Loshi, tha se, me kërkesë të kryesuesit të seancës, Avni Dehari, vazhdimi i seancës konstituive të sotme është shtyrë për në orën 20:00.

Kjo ftesë ka ngjallur pyetje nga deputetja e PDK-së, Blerta Deliu, e cila e quajti “të çuditshme” duke bërë të ditur se caktimi për seancës është bërë pa përfunduar ende kontrollet në Kuvendin e Kosovës.

“Pa dashur të hyjmë në spekulime, por ftesa për seancë në orën 20:00 është, të paktën, e çuditshme. Kontrolli në Kuvend pas alarmit për bombë ende nuk ka përfunduar. Nuk ka asnjë deklaratë zyrtare nga Policia. E megjithatë, dërgohet ftesa për seancë – sikur gjithçka është në rregull. Si po e di kryesuesi se ambientet janë të sigurta dhe se puna mund të vazhdojë pa asnjë pengesë? P.S. Edhe në këto momente, ndërsa po e bëj këtë postim, Policia ende po i kontrollon hapësirat e Kuvendit,” shkroi Deliu në rrjetet sociale.