Tejkalon shpejtësinë me mbi 60 km/h në Ferizaj – dënohet me 300 € dhe 3 muaj pa leje drejtimi

Njësia e Trafikut Rrugor ka ndaluar një shofer që po lëvizte me shpejtësi të tejkaluar në rrugën magjistrale Ferizaj-Prishtinë, në fshatin Prelez të Ferizajt, shkruan Gazeta Sinjali.

Rreth orës 03:05 të mëngjesit, automjeti i markës Audi me targa vendore është kapur duke vozitur me 115 km/h, në një zonë ku kufizimi i lejuar i shpejtësisë është vetëm 50 km/h.

Shoferi, F.B., 41 vjeç, është ndëshkuar me një gjobë prej 300 euro, tri pikë negative në patentë dhe një masë mbrojtëse – ndalim për drejtimin e mjetit për 3 muaj.

Policia Rajonale e Ferizajt ka njoftuar se kontrollet do të vazhdojnë me intensitet, me qëllim të parandalimit të aksidenteve dhe rritjes së sigurisë në trafik.

Autoritetet u bëjnë thirrje të gjithë shoferëve që të respektojnë rregullat dhe shenjat e komunikacionit dhe ftojnë qytetarët të bashkëpunojnë me Policinë e Kosovës.