Reshje të dendura dhe përmbytje në Itali
Rajoni i Lombardisë po përballet me reshje të dendura dhe stuhi të fuqishme që nga mëngjesi i sotëm, duke shkaktuar probleme serioze në qytetet kryesore si Milano dhe Komo, shkruan Gazeta Sinjali.
Për shkak të motit të keq, 13 fluturime janë devijuar nga aeroportet e Milanos dhe janë drejtuar në aeroportin Orio al Serio në Bergamo.
Autoritetet italiane kanë lëshuar një alarm portokalli për stuhi, ndërkohë që liqeni i Komos ka dalë nga shtrati dhe ka përmbytur zonat përreth, duke krijuar vështirësi në qarkullimin rrugor. Situata është përkeqësuar edhe në pellgun e Sevesos, i cili po përballet me prurje të mëdha uji.
Në qytetin Lentate, dy familje janë evakuuar si masë paraprake për shkak të rrezikut të përmbytjeve. Autoritetet janë në terren duke monitoruar situatën dhe kanë këshilluar qytetarët të shmangin lëvizjet e panevojshme dhe të ndjekin njoftimet zyrtare për zhvillimet e mëtejshme.
