I mituri sulmon policin brenda stacionit – Zyrtari detyrohet të përdorë sprej

Një incident i pazakontë ka ndodhur brenda një stacioni policor në Prizren, ku një i mitur është përfshirë në një përplasje fizike me një zyrtar të Policisë së Kosovës, raporton Gazeta Sinjali.

Burimet brenda organit të rendit kanë bërë me dije se ngjarja ka ndodhur më 07 korrik 2025, rreth orës 01:30, në ambientet e Stacionit Policor “Alfa” në Prizren, gjatë procedurës për marrjen në pyetje të një të mituri lidhur me një rast aksidenti.

I dyshuari, A.K. 17 vjeçar, fillimisht ka hyrë në konflikt verbal me zyrtarin policor, e më pas e ka shtyrë fizikisht me duar, duke e detyruar këtë të fundit që të reagojë me “OC-Spray” për të neutralizuar situatën.

Në momentin e incidentit, në dhomë ndodhej vetëm zyrtari dhe i mituri, ndërsa prindi i të dyshuarit, i cili priste pranim të një gjobe për kundërshtim të urdhrave policorë, gjendej në korridor. Burimet thonë se të dy – i mituri dhe babai i tij – kundërmonin erë alkooli.

I dyshuari është intervistuar në prani të prindit dhe avokatit mbrojtës, ndërsa Prokurori i Krimeve të Rënda ka urdhëruar iniciimin e rastit për veprën penale “Sulm ndaj personit zyrtar”, me procedurë të rregullt.