Zjarrvënie e qëllimshme – dyshohet se u dogjën dy parcela me grurë, një person në hetim

Një zjarr i përmasave të konsiderueshme ka shpërthyer dje në qytetin e Vitisë, duke përfshirë dy parcela me grurë, për të cilat dyshohet se janë djegur në mënyrë të qëllimshme.

Burimet e Gazetës Sinjali bëjnë me dije se rreth orës 13:30, në rrugën “Ylvi Demiri”, është raportuar një rast zjarrvënie, ku pas marrjes së informacionit, në vendin e ngjarjes kanë dalë njësitë e policisë, zjarrfikësve dhe inspektori për preventivë të zjarreve.

Si i dyshuar për zjarrvënien është identifikuar Zaim Shefkiu, ndërsa ankuesi në rast është L.N. (1957), i cili ka raportuar djegien e pronës së tij.

I dyshuari është intervistuar në prani të avokatit mbrojtës, ndërsa dëmet materiale ende nuk janë përcaktuar me saktësi, por dyshohet se janë djegur dy parcela të mbjella me grurë.

Pas konsultimit me Prokurorin Kujdestar, është urdhëruar që rasti të regjistrohet si “Zjarrvënie” dhe të procedohet në procedurë të rregullt.