Ofendoi, sulmoi dhe kërcënoi gruan në vendin e punës – Arrestohet dhe ndalohet 52 vjeçari

Numri i rasteve të dhunës në familje në vendin tonë ka marrë përmasa shqetësuese. Çdo ditë raportohen ngjarje të tilla ku viktima zakonisht janë gratë dhe vajzat që përjetojnë dhunë psikike e fizike kryesisht nga bashkëshortët e tyre, raporton Gazeta Sinjali.

Një tjetër rast i tillë është raportuar dje në fshatin Sojevë të Ferizajt, ku një burrë dyshohet se ka ushtruar dhunë psikologjike dhe fizike ndaj bashkëshortes së tij, në prani të dëshmitarëve dhe në vendin e saj të punës.

Burime të Gazetës Sinjali bëjnë me dije se viktima, K.D., rreth 51-vjeçare, ka raportuar në Polici se burri i saj, B.D., rreth 52-vjeçar, ka kohë që i shkakton presion të vazhdueshëm psikik, por më 08.07.2025, rreth orës 17:00, situata ka dalë jashtë kontrollit.

Fillimisht, i dyshuari e ka ofenduar publikisht në vendin e punës, e më pas e ka kërcënuar për jetë. Kur e ka parë që ajo po njoftonte Policinë, ai ka ushtruar forcë fizike, duke e shtyrë me duar dhe ia ka marrë telefonin nga duart, çka ka rezultuar me lëndime të lehta trupore për të cilat viktima ka kërkuar trajtim mjekësor.

Pas daljes së njësive policore në vendin e ngjarjes, palët janë shoqëruar në stacion, mirëpo i dyshuari nuk është intervistuar menjëherë, për shkak se ka qenë nën ndikimin e alkoolit.

Me urdhër të Prokurorit të Shtetit nga Departamenti i Përgjithshëm, është iniciuar procedurë penale për veprën: “Dhunë në familje”.

Ndaj B. D. është marrë masa e ndalimit për 48 orë, dhe ai ndodhet në Qendrën e Ndalimit në Lipjan, në pritje të veprimeve të mëtejme hetimore.