“Pse me keni hy në arë” – Tenton të sulmojë zjarrfikësit

Një rast i pazakontë është raportuar më 8 korrik 2025 në rrugën “Hasan Prishtina” në Obiliq, ku një person i dyshuar ka sulmuar verbalisht zjarrfikësit dhe më pas ka dëmtuar automjetin e tyre zyrtar gjatë një intervenimi për shuarjen e zjarrit në një fushë të hapur.

Sipas informacioneve të Gazetës Sinjali, i dyshuari F.M., rreth 35-vjeçar kishte reaguar ashpër ndaj prezencës së njësisë së zjarrfikësve në atë lokacion, duke i ofenduar dhe pyetur se përse kishin hyrë në tokën e tij.

Ai ka tentuar t’i sulmojë dhe më pas ka marrë një kanister 10-litërsh dhe një shishe 2-litërshe të mbushura me benzinë, me të cilat ka goditur retrovizorin e majtë të automjetit të zjarrfikësve, duke shkaktuar dëme materiale rreth 150 euro.

Policia ka ndërhyrë menjëherë në vendin e ngjarjes, ku ka hasur të dyshuarin në gjendje të rënduar psikike, i cili ka qenë agresiv dhe refuzonte bashkëpunimin me zyrtarët policorë, përfshirë refuzimin për t’u shoqëruar, për të dhënë deklaratë dhe për t’iu nënshtruar kontrollit mjekësor.

I njëjti është arrestuar dhe ndaluar për 48 orë me urdhër të Prokurorit të Shtetit, ndërsa ndaj tij është inicuar rasti për veprën penale “Asgjësim apo dëmtim i pasurisë”, ndërkohë që hetimet po vazhdojnë.