Tiranë: Polici përplas me dhunë të riun te makina

Një ngjarje shqetësuese është denoncuar sot në redaksinë e JOQ Albania, ku një qytetar është ndaluar nga policia në zonën e Gardës, pranë hyrjes së Liqenit Artificial në Tiranë, dhe më pas është sulmuar me dhunë pa ndonjë arsye të dukshme.

Ngjarja ka ndodhur rreth orës 18:40, ku sipas dëshmitarëve, qytetari i ndaluar ka qenë shumë i qetë dhe bashkëpunues, por tensioni është përshkallëzuar pasi ai ka thënë se ishte gazetar. Kjo duket se ka irrituar një nga efektivët, i cili është përshkruar si i gjatë dhe bjond, dhe më pas ka nisur agresioni fizik ndaj qytetarit.

Në pamjet e siguruara nga JOQ shihen disa efektivë të Policisë së Shtetit dhe të qarkullimit që ndodhen pranë një motori dhe një automjeti policie, ndërsa qytetari ndalohet dhe shoqërohet me forcë nga disa efektivë, mes tyre edhe një polic në motor.

Qytetarët e pranishëm janë ndjerë të tronditur nga skena, duke denoncuar sjelljen agresive të uniformave blu ndaj një personi që, sipas tyre, nuk po ofronte asnjë rezistencë.

Ngjarje të tilla ngjallin shqetësim mbi mënyrën se si ushtrohet forca nga ana e policisë dhe si trajtohen qytetarët, veçanërisht kur nuk ka rrezik të dukshëm apo provokim real. Presim reagimin e Policisë së Shtetit për të sqaruar këtë incident dhe për të vënë përpara përgjegjësisë çdo efektiv që tejkalon kompetencat dhe ushtron dhunë të pajustifikuar.

Mesazhi i plotë i qytetarit, i ardhur në redaksi:
“Përshëndetje JOQ! Ky qytetar i ndaluar për kundravajtje u sulmua kot nga policia sepse njëri nga policët u ndje i kërcënuar pasi djali i tha që ishte gazetar. E arrestuan me dhunë pa kuptim. Sot ora 18:40 Tek Garda në hyrje të Liqenit Artificial, Tiranë. Ne ishim vetëm kalimtarë. Ai djali ishte me motor, e kishin ndaluar, ishte shumë i qetë dhe ai polici i gjatë bjond, u bë shumë agresiv dhe pastaj e morën me zor, kaq. Na la shije të keqe si skenë me ata policë agresivë.”